BILBAO EXHIBITION CENTREK ENLIT EUROPE HITZALDIA ETA ERAKUSKETA HARTUKO DITU 2025EAN
Iberdrolak Enlit-ekin duen aliantza estrategikoa aurkeztu du. Enpresa hori Europako trantsizio energetikoaren abangoardian dagoen komunikabide eta ekitaldien arlokoa da.
Aliantza honi esker Bilbo hiri zirraragarrian Enlit Europe konferentzia eta erakusketa egingo da 2025ean. Ekitaldia Bilbao Exhibition Centren izango da.
Data hori baino lehen bi enpresak elkarlanean arituko dira Europako energia-sektoreak gainditu behar dituen erronkak eta dituen aukerak nabarmentzeko.
Aliantza hau Parisen hasiko da aurten, Enlit Europe ekitaldian. Bertan Elena León Muñoz, Iberdrola Taldeko Sareen zuzendari nagusia, eta Nicolas Arcauz, Iberdrola Españako Smart Grids-eko zuzendaria, goi mailako hizlarietako batzuk izango dira.
Asís Canales Abaituak, Iberdrolako Pertsona eta Zerbitzuen zuzendariak, adierazi duenez lankidetza hau “guztiz dator bat irtenbide energetiko jasangarriak sustatzeko eta trantsizio energetiko globalean laguntzeko gure misioarekin. Oso pozik gaude 2025ean Enlit Europe Bilbora ekartzeaz”.
Paddy Youngek, Enlit-eko zuzendariak, Iberdrolarekin eratutako elkartea goraipatu du eta esan du “mugarri garrantzitsua dela, gure markak epe laburrean lortu duen konfiantza eta sinesgarritasuna erakusten duena”.
Enlit Europe ekitaldiaren aurtengo edizioa, hirugarrena, Parisen izango da eta datorren urtean Milanera joango da, 2025ean Bilbora iritsi aurretik. Enlitek komunikabideen hiru marka ere kudeatzen ditu: Power Engineering International, Smart Energy International eta Enlit World.
Youngen ustez Bilbok “agertoki aparta eskainiko du ekitaldi honetarako, eta Iberdrolaren parte-hartzeak, zalantzarik gabe, esperientzia hobetuko du erakusketarientzat zein bisitarientzat”. Ildo beretik, gaineratu zuen lankidetzak Iberdrolak energiaren sektorean duen esperientzia eta sare zabala baliatuko duela Enlitek kalitate handiko edukien programak eskaintzeko duen konpromisoa indartzeko, energia-merkatuaren bilakaerarekin sinkronian.
Tradizioz Euskal Herrian beti egon da lankidetza publiko-pribatu oso emankorra. Eskualdeko agintariak, Eusko Jaurlaritza, Bizkaiko Foru Aldundia eta Bilboko Udala barne, elkarlanean ari dira eta energia-ekitaldi integral honen arrakastarekin konprometituta daude.
Canalesek gaineratu zuenez “Iberdrolak energia garbiko eta sare jasangarrietako konponbideak lantzen ditu, eta Enlitekin indarrak batzeko gogo itzela dago, energiaren arloko etorkizuneko elkarrizketari eta berrikuntzari forma emateko. Horrela Bilbon kokatuta dagoen Iberdrolaren Global Smart Grids Innovation Hub, trantsizio energetikoaren erronkei erantzuten laguntzeko sare adimendunen berrikuntza eta ezagutzaren zentro global gisa finkatu da. Zentroak berrikuntzaren eragile gisa jarduten du, Iberdrolaren gaitasun teknologikoa eta 80 erakunde eta enpresa laguntzaile baino gehiagorena konbinatuz”.
Lankidetza interesgarri honi eta Enlit Europe 2025en berriei buruzko informazio gehiago nahi izanez gero, bisitatu www.enlit.world eta www.iberdrola.com
