BILBAO CONVENTION BUREAUK ZIURTAGIRIA LORTU DU BIOSPHEREREKIN
Bilbao Convention Bureauk lortu berri du bere ziurtagiria Biosphererekin. Erakunde edo destino batek 2023 Agendako Garapen Jasangarriko Helburuen aldeko ekintzekin duen konpromisoa ikuskatzen duen turismo sektorearen nazioarteko erreferentea da Biosphere enpresa. Sektoreak maila globalean bere helburuak 17 GJHekin lerrokatzeko duen gero eta interes handiagoaren ondorioz erakundeak abenduan bere bazkideekin batera hasitako prozesu bat eratu baten emaitza da. Prozesu horren beste emaitza bat, era berean, joan den martxoan Iberdrola Dorreak eskuratu zuen ziurtagiria izan zen.
Bilbao Convention Bureauren kasuan berariaz aintzatesten dira kudeaketa estandarrak betetzeko ahaleginak, hau da, gizartean eragin positiboak izatea lortuz eta, aldi berean, hiriko MICE jardueraren kudeaketa arduratsu eta jasangarriko jardunbide egokiak aitortuz.
Erakundeak abian dituen eta ziurtagiria lortzeko balio izan dioten ekimen ugarietako batzuk honako hauek dira: tokiko eragile guztien arteko GJHak betetzearen aldeko sinergiak sortzeko ahaleginak; hirian gizarte eta ingurumen aldetik jasangarriak diren ekitaldiak antolatzeko tresnen katalogo bat eskaintzea; mugikortasun jasangarria sustatzea; karbono aztarna neurtzea eta era partzialean konpentsatzea; tokiko hainbat gizarte erakunderekin lankidetzan aritzea; tokiko produktu eta zerbitzu jasangarrien erosketa eta kontsumoa lehenestea; edo elikagai soberakinak murrizteko eta dohaintzan emateko sinergiak bideratzea.
**Jasangarritasunarekiko konpromisoa**
Bilbao Convention Bureau 2021etik ari da Garapen Jasangarriko Helburuen alde lanean, “Bilbao Arima Berdea” lan batzorde iraunkorra abian jarri zenetik. Urte horretan bertan Global Destination Sustainability indizean sartu zen, bilerak, pizgarri bidaiak, konferentziak eta erakustaldiak (MICE sektorea) egiteko destino jasangarrien nazioarteko rankingean; indize horretan iaz Estatuko lehen hiria izan zen.
Gainera, Iberdrola Dorrea eta Bilbao Convention Bureau bera ez ezik, enpresa bazkide gehiago ari dira ziurtatze-prozesuan Biosphererekin, euren artean egoitzak, hotelak, hartzaile-agentziak eta kongresuen antolatzaile profesionalak. Bilbao Convention Bureauk laguntza ekonomikoa eta aholkularitza eskaintzen die eta bere Biosphere ziurtapen-programari eusten dio, sektorea edozein dela ere enpresa bazkide guztiei irekita dagoena.
—
