Ekitaldi zientifiko honek presentzialtasuna berreskuratzen du Bilbon ohikoa bihurtu den bilerarekin. Ia hamarkada bateko historia duen kongresua Minbiziaren Ikerketarako Europako Elkarteak (EACR) antolatzen du eta CIC bioGUNEk koordinatuta dago. Bilboko Euskalduna Jauregian egingo den konferentzian 25 herrialdetako 200 ikertzaile baino gehiago bilduko dira ostegunera arte. Ekitaldiak betiko moduan zientzia-dibulgazioari eusten dion Bilboko Udalaren babesa du.

(Bilbo, 2022ko urriaren 10a) Bilboko Euskalduna Jauregiak minbiziaren metabolismoaren ikerketaren arloko aditu handienak bilduko ditu bihar, asteartea, urriaren 11n hasi  eta osteguna, hilaren 13a, bitartean, gaiari buruzko azken aurrerapenak partekatzeko. Bilera hau CIC bioGUNEren ekimen estrategiko batetik sortu zen 2014an, alor honetako ikerkuntza sustatzeko. Ekitaldiak, Minbiziaren Ikerketarako Europako Elkarteak (EACR) antolatua, ia hamarkada batean nazioarteko aintzatespena lortu du; elkarte honek Europa osoko 12.000 ikertzaile baino gehiago biltzen ditu.

Arkaitz Carracedok, CIC bioGUNEko Ikerbasque Ikerketa irakasleak, minbiziaren CIBERONC sare nazionaleko kide eta ekitaldiaren bultzatzaile eta antolatzaileak, honakoa baieztatu du: “zientzialarien ustez ekitaldi hau aukera paregabea da ikerketa onkologikoan egindako azken aurrerapenen berri jasotzeko eta Bilbon  gizarte- eta kultura-ingurune paregabeaz gozatzeko”.

“Cancer metabolism” izenburupean, hainbat gai jorratuko dira, hala nola minbiziaren zelulak elikatzeko modua, gaixotasunaren garapenean edo progresioan eragina izan dezaketen faktoreak eta onura terapeutikoa ekar dezaketen minbiziaren metabolismoaren manipulazioan oinarritutako tratamendu berriak. Carracedok gogorarazi du “dagoeneko minbiziaren metabolismoak pertsonen osasuna hobetzen lagundu du, eta gaixotasunaren jarraipen hobea egiten lagundu du PET bezalako teknologien bidez. Teknologia honi esker azukrea erabil dezakegu pazienteen tumore-lesioak nabarmentzeko”.
Bilboko Udalak eta Eusko Jaurlaritzak babesa berritu diote ekitaldi honi. Carracedok berariaz azpimarratu duen bezala “Bilboko Udalak eta Eusko Jaurlaritzak ekimen hau babesteko duten estrategiak I+G+b arloan duten interesa gogorarazten digu eta gure zentroen kalitatezko ikerketa munduan ikusarazten jarraitzera bultzatzen gaitu”.
Honelako ekitaldiei emandako laguntzari esker Bilbon ohikoa bihurtu da ikerketaren zabalkundea. Ikuspegi dibulgatzaile eta sozialetik hasi eta izaera zientifiko hutseko elkarrekintzaraino, hiriak, azken bi hamarkadetan, ekintza ugari sustatu ditu zientzia bere kaleetako DNAn jartzeko.

Konferentzia hau CIC bioGUNEren helburu estrategikoaren barruan kokatzen da, hau da, biomedikuntzan egindako aurrerapenak maila zientifikoan zabaltzea nazioarteko oihartzuna duten gaikako kongresu espezializatuekin eta, gizarte mailan, Minbiziaren Aurkako Espainiako Elkartea (AECC) bezalakoekin koordinatutako dibulgazio-ekintzen bidez.